🔍كم مره دخلك موبايل فيه مشكله شحن ورغم إنك حاولت بكل الطرق انك تحل المشكله دي ولكنك أخفقت في حل المشكله.
🔍كم مره واجهتك مشاكل زي إن الموبايل يشحن وهو مغلق ولا يشحن وهو يعمل أو العكس
🔍كم مره واجهتك مشكله إن الموبايل يشحن عادي دون ظهور علامه الشحن علي الشاشه
🔍كم مره واجهتك مشكله إن علامه الشحن تكون ظاهره عادي لكن الموبايل مبيرفعش شحن
🔍كم مره واجهتك مشكله إن الموبايل لما توصل الشاحن علامه الشحن تظهر وتختفي
🔍كم مره واجهتك مشاكل زي إن الموبايل بيشحن شحن بطيئ بقيمه 0.6 ملي امبير وغير قادر علي الشحن السريع.
🔍كم مره فضلت شغال باليوم واليومين وحاولت تصلح مشكله متعلقه بدايره الشحن ولكنك لم توفق.
🌹كل المشاكل اللي كتبتها لحضرتك فوق دي ظهرت مؤخرا بسبب إن الشركات طورت منظومه الشحن في الهواتف.
ودوائر الشحن الحديثه مختلفه تمام الاختلاف عن دوائر الشحن في الهواتف القديمه.
هتسأل ليه الشركات طورت ايسيهات الشحن؟🤔 هجاوبك واقولك إن شركات الهواتف المحمولة أصبح فيه منافسه💥 بينهم بخصوص حاجتين مهمين ألا وهما... أولا سعه البطاريه🔋 ثانيا موضوع الشحن السريع..📈 والحاجتين دول مينفعش الهظار فيهم لأن أي خلل ممكن يؤدي لمصائب كبيره وحرايق وليله كبيره سعادتك. 🔥🧑🚒
فلازم الموضوع يكون مدروس من قبل الشركات بحيث حضرتك تستفيد بأهم حاجتين من الهاتف المحمول بطاريه كبيره وشحن سريع.
وطبعا بسبب تطوير ايسيهات الشحن وتعقيد منظومه الشحن ظهرت مشاكل كتيره بتخلي فني الصيانه يشد في شعره علشان يقدر يحل المشكله 🤬 بس طبعا في حاله واحده لو كان الفني مش فاهم أو حافظ بدون فهم.
تعالي بقا النهارده يا صديقي ناخد مثال لواحد من أشهر ايسيهات الشحن الحديثه إللي أصبحت موجوده في معظم الهواتف إللي بتدخلنا والفني للأسف يقعد يغير ف ايسيهات ويوصل في بريدجات ويعمل ريبولنجات ولكن كل تعبه ده يضيع هباء 🤒
وأنا النهارده هدردش معاكم بخصوص فهم اليه عمل ايسي الشحن اللي من نوع
🐙bq25601🐙
واللي أنا شخصيا مسميه الاخطبوط 🐙نظرا لاحتوائه علي ٢٤ مسار ومش بس كده دا فيه مسارات منهم متفرعه وليله كبيره.
تعالا بقا نفتح بطن الأيسي ده ونعرف حكايته بالتفصيل علشان لما يدخلك جهاز فيه مشكله شحن متشتغلش عشوائي وتتعب نفسك بالساعات. لكن لو انت فاهم هما يادوب دقيقتين تلاته بالكتير وهتكون موفق بإذن الله في حل المشكله 🧑⚕️🩺
نبدأ ببسم الله والصلاة والسلام على أشرف الأنبياء والمرسلين سيدنا محمد صلى الله عليه وسلم.
عايزك قبل ماتنزل للكلام المكتوب ده تصفي ذهنك لأن دماغك هتلف شويه😵💫 لأني قولتلك قبل كدا ان ده ايسي عاق وبيحتاج تفتيح مخ علشان تقدر تفهمه فالمطلوب منك إنك وإنت بتقرأ الشرح إللي هشرحهولك تحت ده إنك ترسم صوره للايسي في خيالك وتعرف انه عباره عن ٢٤ مسار ظاهرين قدامك والايسي ذات نفسه من جوا عباره عن غرف داخليه وبيحصل جواه عمليات سويتشنح وليله كبيره زي الاخطبوط بالظبط وكل مسار ليه فايده كبيره وأي خلل فيهم ممكن يسبب مشكله من المشاكل اللي كتبتهالك فوق.
فصحصح كدا وانزل الأول بص على الصوره اللي رسمتهالك وعايزك تركز في حاجه وآحده ألا وهي اتصال المسارات إللي خارجه من الأيسي ببعض
زي مثلا ان المسار رقم ١ و٢٤ متصلين ببعض ومثلا المسار رقم ٢ و ١١ و٢٢ برضه فيه اتصال بينهم وبين بعض وبرضه المسارات رقم ١٩ و٢٠ و٢١ فيه اتصال بينهم وبين المسارات رقم ١٥ و١٦ عن طريق ملف الشحن وبرضه هنلاحظ اتصال المسار رقم ١٣ و١٤ ببعض وهتلاحظ وجود مسارات nc بمعني المسارات ال ٢٤ الخارجين قدامك فيه عمليات بتتم داخل الأيسي بينهم وبين بعض
فعايزك كل ما اشرحلك وظيفه مسار معين تنزل تاخد نظره في الرسمه اللي تحت أو على الأقل هات ورقه وقلم واكتب وظيفه كل مسار علشان حتي لما تيجي تفتح الاسكيماتك الخاص بالأيسي تكون فاهم.
أولا كلمه bq اختصار ل
(breakly quantum)
والايسي ده مسؤول عن عمليه شحن وتشغيل الهاتف يعني شحن واقلاع ويحتوي على العديد من المسارات الخاصه باستشعار درجه حراره ونسبه البطاريه وغيره وغيره
هناخد كل مسار من ال٢٤ مسار إللي خارجين من الأيسي ده ونفهمهم مع بعض بالتفصيل وطبعا إحنا ف مجال المحمول بنعد عكس عقارب الساعة فهناخد أول مسار رقم واحد من علي الشمال ونكمل مع بعض عكس عقارب الساعة وفيه ملحوظه كمان انا مش هشرح المسارات بالترتيب أنا هشرح بطريقه تسلسل الفولت فمتستغربش لما تلاقيني بقفز بين المسارات
من البداية خالص لما حضرتك بتوصل الشاحن في كونيكتور الشحن. إيه إللي بيحصل ؟ إللي بيحصل هو مرور فولت بقيمه ٥ فولت والفولت ده بيمر بال ovb إللي بيعمل فحص لسلامه التيار وفي حاله صلاحيه الجهد بيمررهم لايسي الشحن .
نمشي مع الخمسه فولت بتوعنا لحد ما ندخل بيهم علي المسار رقم ١ والمسار رقم ٢٤ في الأيسي و أحيانا المسار رقم ٢٤ بيكون غير متصل يعني NC يعني نوت كونيكتينج.
نقول تآني الخمسه فولت هيدخلوا علي المسار رقم واحد والمسار رقم ٢٤
طيب إيه إللي بيحصل داخل الأيسي بعد دخول الفولت ليه عن طريق الخط رقم ١ و٢٤ ؟؟؟
هقولك ياصديقي يوجد داخل الأيسي موسفت بياخد الخمسه فولت إللي داخلين للايسي ويخزنهم علي مكثف مهم جدا جدا موجود علي الخط رقم ٢٣ وبيكون اسم المكثف ده علي المخطط (pmid) وخلي بالك من المكثف ده لان معظم الفنيين أثناء نزع الشيلد من علي أي سي الشحن ممكن يحصل نزع المكثف ده وبالتالي حضرتك علامه الشحن هتظهر طبيعي لكن دون زياده في عمليه الشحن فلازم حضرتك تعوضه في حاله فقده.
طيب إحنا قولنا فوق إن فيه موسفت داخل الأيسي والموسفت ليه أطراف طرف منه بياخد الخمسه فولت يوديهم لمكثف ال pmid علشان يخزن الفولت والطرف التاني بيروح فين ؟ هقولك بيتجه للخط رقم ٢٢ للايسي وإللي بيكون اسمه علي المخطط👇
(REGN)
اختصار ل regulator voltage line وبرضه هشرحلك منظومه عمله من داخل الأيسي علشان كدا قولتلك قبل كدا ان كل دراستي متعلقه بطريقه عمل الأيسي من الداخل فبيحصل تداخل ف المعلومات مع اللي حافظ مش فاهم وتلاقيه داخل يفتي بدون فهم وياريته حتي بيعرف يرد دا بتلاقيه طالع جري شبه الطفل الصغير ويروح لمدرب من المدربين إللي نفخه قبل كدا ف مبلغ محترم علشان المدرب الأبجر ده يرمي بكلام ملهوش لازمه.
نرجع لموضوعنا.... المسار رقم ٢٢ إللي إسمه REGN لما بياخد الخمسه فولت إللي جايين من الموسفت الداخلي بياخدهم ويروح فين ؟ هقولك بياخد الخمسه فولت ويعملهم عمليه تجزئه جهد عن طريق اتصاله بمقاومتين تجزئه جهد (R1+R2) قيمه كل مقاومه 10 كيلو أوم. وبما إن الفولت إللي داخل للمقاومتين دول قيمته خمسه فولت يبقى الخرج يساوي نصف الدخل فهينتج عندنا فولت قيمته 2.5 فولت.. بيروحوا فين بقا ال 2.5 فولت دول ؟ بيرجعوا لايسي الشحن عن طريق المسار ١١ واسم المسار ده هيكون (TS) اختصار ل thermal sensing الاحساس بالحراره
وهتلاحظ برضه إن فيه اتصال بين المسار دا وبين المسار رقم ٢ في ايسي الشحن إللي هنلاقي اسمه (PSEL) اختصار ل
power sourcse selection
باور سورس سيليكشن
فايدته إيه المسار ده. هقولك يامعلم إن المسار ده خاص بعمليه الشحن السريع
طيب إزاي. هقولك المسار ده بيكون متصل علي مقاومتين منهم واحده nf والتانيه بقيمه 10 كيلو أوم. وبما إن المسار ده متصل مع المسار رقم ١١ والمسار رقم ٢٢ يبقي المفروض يكون عليه فولت بقيمه 5v
طيب لو نزعنا المقاومه من على الخط الPSEL إيه اللي هيحصل؟ هقولك الموبايل هيشحن معاك شحن عادي وبطئ بقيمه 0.6 ملي أمبير. يعني لو وصلت الموبايل على تيستر الشحن هتلاقيه ساحب. 0.6 ملي أمبير أما لو مسار ال psel مظبوط الموبايل هيشحن معاك نظامي ولو وصلته علي التيستر هيسحب معاك فولت تتراوح قيمته من 1.6 ل 2.2 امبير
طيب لو نزعنا مقاومه من مقاومتين التجزئه إللي موجودين بين المسار رقم ٢٢ والمسار رقم ١١ اللي اسمه TS إيه إللي ممكن يحصل ؟ هقولك ممكن المعالج يوقف منظومه الشحن بالكامل. طيب يامعلم المعالج هيعرف إزاي الكلام ده كله ؟هقولك ياصديقي انه بيعرف صلاحيه المنظومه دي من خلال التخاطب بينه وبين ايسي الشحن عن طريق بروتوكول I2S إللي بيتمثل في المسار رقم ٥ والمسار رقم ٦ إللي اسمهم SDA&SCLK
يبقي المسار رقم خمسه وسته دول المسارين إللي متصلين بين ايسي الشحن والمعالج وإللي من خلالهم المعالح بيعرف صلاحيه ايسي الشحن من عدمه..
بعد كدا ندخل على المسار رقم ١٩ و٢٠
ودول كبار العيله هما اللي بيشتغلوا علشان يغذوا باقي الدواير. طيب بيشتغلوا إزاي هقولك عن طريق القيام بعمليه سويتش علشان كدا اسمهم خطوط sw طيب عمليه السويتشنج علشان تتم بنحتاج إيه ؟ هقولك بنحتاج موسفت وملف و مكثف ودايود.
الملف هيكون هو ملف الشحن اللي كلنا عارفين انه دايما بيكون اسمه xl وإللي دايما بيكون موجود بجوار ايسي الشحن
أما المكثف هيكون اسمه BTST أو مكثف البوت وركز معايا الله يباركلك في المكثف ده لأنه مهم جدا جدا بنلاقيه موجود علي المسار رقم ٢٣ وبيكون واصل توالي طرف منه متصل بالأيسي والطرف التاني متجه لملف الشحن علشان يكمل عمليه السويتش مع المسارين رقم ١٩ و٢٠
طيب أعرف صلاحيه المكثف ده إزاي ؟ هقولك عن طريق وجود فولت قيمته تتراوح من 7 ل 8.5 أمبير علي الطرف المتصل للايسي. أما الطرف التاني اللي متصل مع ملف الشحن و برضه متصل مع المسار رقم ١٩ و٢٠ من الأيسي هتلاحظ وجود فولتيه بقيمه تتراوح من 3.7 الي 4.2
يبقي مكثف البوت ستراب لما نحب نقيسه هنقيسه بالافو ونتأكد من وجود الفولتيات إللي كتبتهاك وإللي بتكون على الطرفين مش طرف واحد لانه واصل توالي. طرف هتلاقي عليه 8 وطرف هتلآقى عليه 4 وفي حاله عدم وجود هذا المكثف لن يتم حدوث عمليه السويتشنح وبالتالي عدم إقلاع الهاتف
طيب هنستفاد إيه من عمليه السويتشنج دي؟ هقولك ياغالي بيخرج عندنا فولت التغذيه الرئيسي المعروف باسم VPH علشان يغذي دوائر مهمه زي دايره الباور والصوت و الاضائه والشبكه وغيره وغيره.
طيب هل بعد خروج فولت ال VPH بيروح يغذي الدواير وخلاص ؟ هقولك برضه هنستخدمه علشان نشحن بيه البطاريه. طيب هنشحن بيه البطاريه إزاي ؟ هقولك عن طريق دخول الفولت تاني لايسي الشحن عن طريق المسار رقم ١٥ و١٦ تحت مسمي VPH أو VSS ودول مجرد اسمين علي حسب كوالكوم أو ميديا تك.
طيب ياغالي بعد ما الفولت ده يدخل للايسي عن طريق الخط رقم ١٥ و١٦ إيه إللي بيحصل ؟ هقولك برضه بيحصل عمليه سويتش عن طريق وجود موسفت داخل الأيسي والناتج من عمليه السويتشينج يخرجلنا علي المسار رقم ١٣ و١٤ علشان يشحن البطاريه وبيكون اسمه charging out line
المسار ده هنلاقيه متصل مع مقوامتنا الجميله اللي دايما بنشوفها في البورده بحجمها الكبير وإللي بتكون بقيمه (0.01) أو (0.010) أوم والمقاومه دي اسمها cnc أو shunt resistance.
المقاومه دي بتقيس التيار الموجود داخل البطاريه أو البطاريه محتاجه قد إيه علشان تشحن عن طريق منظومه FG وإللي هشرحهالك بعدين بس نفهم الاول باقي مسارات الأيسي.
🚗بعد كدا ناخد بعض ونطلع علي المسار رقم 7 وهنلاقى إن ده مسار إشاره يرمز ليه ب INT (انتربت)يعني إشاره مقاطعه. المسار ده بيكون طالع منه خطين أو مسارين. مسار رايح للمعالج اسمه smb INT والمسار التاني متصل علي مقاومه قيمتها ١٠ كيلو أوم رايحه لايسي الباور علشان تاخد فولت بقيمه 1.8 فولت من ايسي الباور. طيب يامعلم لو المسار ده حصل فيه تلف ؟ هقولك بكل بساطه علامه الشحن مش هتظهر معاك ولو وصلت الموبايل على التيستر هتلاحظ ان الموبايل بيسحب شحن لكن مفيش علامه شحن ظاهره. وبرضه هفهمك علامه الشحن بتظهر علي الشاشه إزاي. طبعا إحنا قولنا المسار رقم 7 متصل مع المعالج وعليه فولت بقيمه 1.8 جايين من ايسي الباور فأول لما حضرتك توصل الشاحن بيحصل عمليه إسمها pull down داخل المعالج واللي بيحصل ان الفولت إللي بقيمه 1.8 بيحصله خفض فالمعالج بيدي أمر للشاشه انها تظهرلك علامه الشحن
بعد كدا نطلع علي المسار رقم ٣ في ايسي الشحن هنلاقى ان المسار ده إسمه علي المخطط(pg) أو sys ok بيكون واصل لايسي الباور.. لازمته إيه المسار ده ياغالي ؟ هقولك لما حضرتك تكون قافل موبايلك وتيجي توصله علي الشاحن المسار ده بيرسل اشاره لايسي الباور علشان يشغل دوائر الbuck و ال ldo ومن خلال المعالج بتظهر علامه الشحن علي شاشه موبايلك. طيب لو فيه خلل في المسار ده ايه اللي هيحصل ؟ إللي هيحصل إنك هيظهر معاك عطل يشحن والموبايل مفتوح ولا يشحن والموبايل مغلق..
ننتقل بعد كدا للمسار رقم ١٢ إللي هنلاقى اسمه(QON) .. هتسألنى فايدته إيه المسار ده مش هجاوبك وعايز أشوف الاجابه الصحيحه في التعليقات
وفيه خط برضه مذكرتهوش ياريت المهندس اللي فاهم يكتبه برضه في التعليقات
وأخيرا حفظكم الله جميعا أعضاء جروب افهم هارد وير. الجروب الوحيد اللي واقف جنب الفني الغير مقتدر ماديا أو الفني إللي محتاج يفهم بطريقه سهله وسلسلة
دمتم في رعايه الله ومتنسوش عايزين نشوف إجاباتكم علي السؤال المطروح عن وظيفه مسار ال(QON) وإللي بيكون رقمه ١٢ في ايسى الشحن
وياريت لو حد عنده استفسار بخصوص حاجه في المنشور يسأل وميستعجلش ف اني ارد عليه لأني اقسم بالله وقتي مش ملكي ومش دايما بمسك الموبايل
وياريت دعوه حلوه منكم في التعليقات علشان عايزين نشوف عدد الناس إللي بتتفاعل معانا
أخوكم مهندس هيثم الديب
شعارنا في الجروب.... هتفهم هارد وير بدون ماتضيع وقت كتير
إرسال تعليق